Il-kors huwa għodda maħluqa għall-professjonisti tal-edukazzjoni biex jippromwovu s-sensibilizzazzjoni dwar il-vaċċini fil-klassi u jagħtu spinta lill-fiduċja fil-vaċċini. Dan il-kors, li hu mifrux fuq ħames moduli, jipprovdi l-għarfien espert dwar ix-xjenza li fuqha huwa bbażat l-iżvilupp u l-funzjonament tal-vaċċini. Min isegwih jikseb għarfien siewi dwar ir-regoli u r-regolamenti tas-sikurezza fl-iżvilupp tal-vaċċini u li jirregolaw l-awtorizzazzjoni tiegħu fil-livelli nazzjonali u tal-UE, kif ukoll fehim aħjar tar-rigorożità xjentifika li tirfed l-ittestjar kliniku; tal-iskedi nazzjonali tal-vaċċinazzjoni, u tal-benefiċċji tal-vaċċinazzjoni fl-istadji diversi tal-ħajja. Barra minn hekk, il-Kors jippromwovi l-litteriżmu dwar il-vaċċini billi jindirizza l-miti komuni dwar il-vaċċinazzjoni u jipprovdi risposti xjentifiċi għalihom.

Dan il-Kors jipprovdi għodod ta’ informazzjoni u komunikazzjoni ta’ livell xieraq li jistgħu jużaw il-professjonisti fl-edukazzjoni biex jgħallmu lill-istudenti fl-iskejjel primarji u sekondarji dwar il-vaċċinazzjoni.

Kull modulu ta’ dan il-Kors jinkludi test għal qabel ma jibdew il-kors, filmati edukattivi, test għal wara li jkun sar il-kors, u filmat bi student spjegatur li jgħin lill-għalliema jgħaddu dak li jkunu tgħallmu lill-istudenti tagħhom. Il-moduli huma indipendenti u jistgħu jiġu segwiti fi kwalunkwe ordni.