Dan L-Eżerċizzju Huwa Magħmul Għan-Nies Bl-Abbiltà li jifmu u jaqraw il-Malti ta’ Livell B2 tal-Qari u l-Kitba tal-Malti.
Sinjuri u Sinjuri!
Illum ser nibdew billi nagħmlu naqra eżerċizzju tal-għarfien (comprehension) u l-qari. Hawn taħt għandkom silta li għandha x’taqsam mal-mużika ta’ Malta fi Żmien il-Milied biex tipprattikaw u titgħallmu ftit mill-vokabularju Malti. Fl-istess nifs, ukoll ser tingħataw xi ftit informazzjoni ġdida dwar il-mużika ta’ Żmien il-Milied f’Malta.
Mela, aqbdu pitazz jew biċċa karta, stampaw jew niżżlu din is-silta fuq l-għodda elettronika tal-għażla tagħkom, aqbdu lapes jew xi ħaġa li timmarka, u ejjew ħa mmexxu!
Tinsewx titfgħu r-risposti tagħkom fil-kummenti biex imbgħad nikkorreġuhom flimkien :-)
Il-Milied Fost il-Maltin
Fost il-Maltin, il-festa tal-Milied hija waħda mill-aktar festi kulturalment importanti. Fost it-tradizzjonijiet li nsibu fi Żmien il-Milied, hemm il-presepji, il-prietka tat-tifel, il-quddiesa ta’ nofsillejl, il-qagħaq tal-għasel, l-imbuljuta u l-mod uniku li għadd ta’ djar iżejnu għal din iċ-ċelebrazzjoni. Għalkemm dawn it-tradizzjonijiet kollha jixirqilhom artiklu għalihom infushom, illum minflok ser niffukaw fuq xi ħaġa li tikkumplimenta, imma li ta’ spiss tkun fl-isfond ta’ għadd ta’ dawn it-tradizzjonijiet: il-mużika tal-Milied.
Il-kanzunetti li għandhom x’jaqsmu mal-Milied huma ftit mill-aktar għanjiet li l-Maltin jgħożżu. Mill-kanzunetti li nkantaw fil-knejjes sal-X-Tend, il–mużika tal-Milied ma tiqafx f’Malta minn lejn l-aħħar ta’ Novembru sal-bidu ta’ Jannar.
Il-Mużika fil-Knejjes
Fuq livell kostituzzjonali, Malta hija meqjusa bħala pajjiż kattoliku. Għalkemm il-każ hu li hemm pluraliżmu reliġjuż u kulturali li jmur lura sa żmien ir-Rumani u lil hinn, dan l-element għandu impatt kbir fuq kif il-festi huma ċċelebrati f’Malta, speċjalment fil-każ tal-mużika. Matul is-snin, il-mużika sagra ddominat il-Milied b’kant ta’ korijiet tradizzjonali b’kanzunetti bħal “Ninni La Tibkix Iżjed”, “Qed Jinfirex mal-Widien” u “Ħallejt O Alla s-Sema”. Dawn jitkantaw f’kunċerti tal-Milied u anke fil-famuża quddiesa ta’ nofsillejl u fl-avvent. Il-lum il-ġurnata, dawn il-kanzunetti m’għandhomx biss assoċċjazzjoni reliġjuża, imma waħda kulturali
Il-Mużika tal-Milied Popolari
FIl-każ tal-mużika tal-milied popolari, f’dawn l-aħħar deċenji għadd ta’ bands u kantanti ħarġu xi kanzunetti b’laqta moderna. Dawn jinkludu kanzunetti bħal “Christmas Father (Ġibli Pupa)” tal-X-Tend, “Ninu Ninu tal-Milied” ta’ Joanne Mifsud u “Ġej il-Milied”. Dawn il-kanzunetti jindaqqu l-aktar waqt il-festini tal-Milied, fit-toroq Maltin jew waqt xi kunċerti tat-tfal tal-istaġun.
––––––––––––––––––––
Il-Mistoqsijiet
Żmien il-Milied huwa important għal Maltin. Tista’ tgħidli għaliex fl-opinjoni tiegħek?
Semmieli erba’ tradizzjonijiet Maltin marbutin ma’ Żmien il-Milied
Semmieli kelma oħra għal “diska” mis-silta.
Tista’ ssemmieli tradizzjoni jew ikel tradizzjonali Malta marbut mal-Milied li mhuwiex f’din is-silta?
Tista’ tagħtini isem ta’ kanzunetta li hija popolari u mhux sagra?
Ħares lejn dawn il-kliem u qabbilhom mat-tifsira t-tajba bl-Ingliż:
Kor Midnight
Presepji Season
Nofsillejl Valleys
Widien Cribs
Staġun Choir